patpatrabbit的部落格

今日因為要去由布院，所以要早啲行晒上午的行程~~~今朝的行程係去熊本，因為所有的車飛噚日已係 JR みどりの窓口 換好晒，所以可以安安落落食個早餐先~~~ 今朝早餐係博多車站的 Seattle's Best Coffee 度食，其實都唔錯，不過如果佢會幫我整熱返啲包會更好~~~!! 食飽就坐到夠鐘上月台就可以，我地攞住 JR Pass 的，唔駛入飛，直接比個 Pass 同車票比職員睇就可以去月台了。 我地 新幹線さくら４５１号 由博多去熊本，大半個鐘就到，好快的~~~!! 新幹線的列車真係好有型~~~!! 嚟到熊本站，我地要再轉市電 A 系統先去市役所前站然後再行入熊本城，好彩呢啲電車都快，大概 6 - 10 分鐘就有一班車。 落咗車之後就有指示，所以都易行， 去到城門附近仲會見到加藤清正公像。 熊本城 ，外表是很漂亮的，但內裏的展品感覺比大阪城還要小........ 不過一場嚟到都要上天守閣望望的.......... 係天守閣落返嚟之後，我地都去咗本丸御殿度行，我反而覺得呢個做得出色，不過如果佢可以加返啲地氊而唔駛客人行膠墊咁會好啲啲，而家似行緊石春路咁，吉到隻腳好痛......... 成個本丸御殿最靚係呢個以前城主要嚟見家臣的地方........超大的.......... 越近城主坐的位置越見金碧輝煌~~~ 呢個係茶室~~~ 睇完呢個本丸御殿，我地就離開熊本城去 桜の馬場 城彩苑。佢有接駁車去熊本城架，不過兩者其實相距不遠，行過去都好近，而且我地比預定的時間更早行完熊本城，所以可以慢慢行過去~~~ 其實呢度係做到幾懷舊的，街景都係模仿以前的日式建築~~~ 行過 天草海食まるけん 比佢個 うにコロッケ（炸海膽餅）吸引咗，其實唔係想像中咁好味，因為佢唔夠想象中咁多海膽同甜，不過不失咁啦~~~ 另外我地都買咗呢個，不過未開，唔知有無海膽味......... 係呢個城之彩苑行完一個圈都未夠鐘搭車去由布院，所以再去香梅庵食咗呢個芝麻饅頭同牡丹餅。原來牡丹餅入邊係包飯的......... 今日天氣好唔穩定，陰陰天落落雨的，係呢度飲杯熱茶食件餅仲可以嘆住暖氣，真係唔錯的選擇呢~~~ ​

今次的旅程早係大半年前已計劃定，見 HK Express 做八折時買定的平機票，但買完就驚了........因為見佢有好多負評，除咗話有 Delay 之外，仲有回程機可以突然間早咗兩個幾鐘頭開，而無通知客人的（此乃我們客人的親身經歷）........總之越臨出發時間，聽得越多呢啲..........搞到我差唔多日日都要入去佢網站查佢航班時間有無改........佢搭唔搭得過真係見人見知............ 去九州除咗機票，車票都係預早準備定好，因為一落地就可以換車票，可以慳返少少時間。今次我張三日北九州 Pass 就係幫襯東瀛遊買的，好似有九折，但佢地唔收信用咭，一定要比現金或 EPS，訂咗之後大概一星期就可以攞~~~!! 因為 Pass 只可以連續三日用，所以一定要諗清楚行程，計清楚車費先買哦~~~!! 我地今次塔 12:50 的機出發，去到福岡已要五點了。因為買嗰陣只有呢班機，所以無辦法，點知我買完機票後一星期左右，佢開多一班飛朝早 07:30 的，我打電話想去改早一班機時，HK Express 的客服態度真係好差，而且改機票仲要加錢，費用係唔平的，所以最後無改到。但對呢間 Airline 的印象真係麻麻地。 今日我地都特登早少少去機場，驚佢臨時有嘢改，另外仲要搵我同 Joey 上次搵唔到的 Longue。 今次終於搵到，原來 American Express 呢個 Longue 係 40 號聞附近再上一層電梯就見到。雖然 American Express 係自助餐，但因為呢度坐位好少，而且我地都趕住去閘口，所以淨係攞咗兩枝水就走咗............ 因為飛機上係無餐食的，我地食咗個早餐就出咗門口，係機上個肚就咕咕聲係咁叫，不過都要忍~~~~!! 好彩由機場去酒店好近~~~!! 福岡國際航廈要先坐接駁巴士去國內線航廈先可以坐到地鐵出博多站，所以記要預多少少時間。 我地今次住呢間 Hakata Green Hotel No 1，佢位置勁好，真係 JR 博多站筑紫口二至三分鐘路程，附近仲有兩家 Family Mart 超方便~~!! 房間雖然有啲暗，但勝在好 "四正" 又企理，下一次嚟，我同細佬都會訂返呢間~~~~!! 因為真係好肚餓，Check-in 完都已經六點幾，拿拿臨洗個面就去一蘭食個拉麵，朝朝聖先~~~!! 一出博多車站，勁靚，超有聖誕氣氛~~~!! 除咗啲樹圍晒 LED 燈之外，仲有好多啤酒同外國嘢食攤位係博多站，超熱鬧的~~~!!! 今次近近地去サンプラザ地下街内的一蘭分店，因為佢係正博多車站對面，很易搵到~~~!! 一蘭的麵真係一如既住的好，大愛~~~!! 呢間一蘭隔離就係 マツモトキヨシ，要買藥品真係一流~~~!! 今次因為要幫同事買埋嘢，順利買過一萬円，可以退稅，不過而家的退稅包裝真係令我好難 Pack 嘢返屋企....... 食飽就有氣有力行街啦，趁阪急同 AMU / AMU East（JR Hakata City）。一入去就掃絲襪先，本來想多買一樣 Vivienne Westwood 的 Leggings 可惜見唔到......最尾我買咗一對 Vivienne Westwood 同 Lanvin en Bleu 的絲襪。 臨比錢時，姐姐問我有無優惠卷，我話無，佢即刻幫我去咗攞一張九五折優惠卷返嚟，又平咗，而且仲可以用到七號，超好服務呀~~~!! 跟住一上電梯就見到 Burberry Blue Label，未嚟之前已見代購賣的頸巾好靚，一早已計劃要買一條自用，估唔到咁快見到，仲要買到我最愛的桃紅色~~~!! 其實今次都諗住去 Lanvin en Bleu 買返個銀包，但 AMU Plaza 呢間店太細，真係無乜款好揀，所以買唔到。之後落咗超市買宵夜，最後揀咗 Morozoff 的布甸做甜品，真係好味呢~~~!! ​

忽然抽起條筯想訂啲爪夾，於是去咗樂天的 お世話や。今次仲幫同事買咗兩對耳環～ 我自己就偏好啲浮誇啲大粒啲的耳環～所以㨂咗呢對～     跟住全部都係頭夾～隻隻都好靚呢～          ​

終於比我搵到一家是按實重嚟收費的轉運公司，而家我都可以買到美國貨啦～當然有部分貨都要搵代購或朋友幫手買啦～ 始終係第一次幫襯，唔敢買太貴嘢，先來一個 Kate Spate 小銀包試試先，一來佢做緊特價，而且係我好鐘意的墨綠色～         買完之後先醒起要買生日禮物比 Joey 同 Mika, 於是第二日再買咗對耳環同手鍊比佢地～ 等咗兩個星期到就到香港～好開心哦～​

好耐無買過英國嘢，但自從開始睇石原さとみ 主演的 《5→9〜私に恋したお坊さん〜》之後真係好鐘意佢帶的 Daniel Wellington 手錶 同 Michael Kors 的雙面袋～ 好在一向有睇開微博，知 Daniel Wellington 錶在 Amazon UK 間唔時會有特價，而且我今次仲捉到佢可直郵香港～而家比起係香港買平咗成一半呢～   ​

之前睇亞歷媽的 Instagram，見佢成日都介紹滴雞精，之後見之前幫襯買韓國化妝鏡嗰間網店都有賣，所以就開始研究～ 睇咗好多都係要一買買好多，最少都要八樽，始終未試過而且價錢真係唔平，好怕自己買咗唔願飲...... 最近見高野家有四枝體驗裝出，訂咗嚟試，台灣直送，價錢 TWD 999，而且包裝好好，完全無破損，正～       訂咗之後電器妹話香港有間田原香都係專賣滴雞精的，佢係第一家攞正牌嚟香港的而且仲可以試飲。所以我都去睇咗，價錢同高野家的差唔多，但佢就分咗好多唔同功效，可以更針對性去調理，但田原香的麻煩在全都要雪，而且唔建議原包座熱.......所以諗諗下就無買啦～不過原來滴雞精個味係似無落鹽的雞湯，都未至於難入口～但熱確實係好飲啲～​

再嚟新挑戰～今次試我好愛的朱古力曲奇，上次整檸檬牛油酥有牛油淨，諗住買多兩條牛油就 ok，點知打開舊嗰條發覺佢係中間變黑咗，又唔想落街買焗住變咗少牛油版，跟住又發覺唔夠糖，再變埋少糖版～好彩整出嚟都好味～       ​

今日又放重陽節假～又可以整餅～今次試整牛油酥～不過失敗咗，可能係落咗太多檸檬汁，好酸～明明係跟足書的.....下次都係要自己試咗個檸檬有幾酸先得，書..........不能盡信........   ​

自從整過上一次之後，我阿媽簡直深深愛上呢個曲奇，一日都黑都叫我再整～好好好～一於趁今日放假再整～ 呢個餅真係好吸引，根本會食到停唔到口，唔知係咪啲紅茶夠靚，真係超香～  ​